Migrazioen Nazioarteko Erakundearen arabera, gogoz kontrako migrazioa zera da: "pertsona batek emigratzea pertsekuziotik, gatazketatik, errepresiotik, natura-hondamendietatik, gizakiak eragindako hondamendietatik, degradazio ekologikotik eta pertsonen bizitza, askatasuna eta bizimodua arriskuan jartzen duten egoeretatik ihes egiteko".

Datuek argi erakusten duten zein larria den gaur egungo egoera. 2014an, 59 milioi pertsonak baino gehiagok utzi behar izan zuten beren etxea gogoz kontra, eta kopuru hori gora doa oraindik ere, azken aldiko gatazken ondorioz -Siriakoa, esate baterako-.

Denontzako mundu hobe bat nahi badugu, lan handia egin behar dugu zailtasunak dituzten tokietan bizi-baldintza duinak bermatzeko, desparekotasunari, gerrari, indarkeriari, pertsekuzio politikoari, analfabetismo kronikoari, segurtasun faltari eta etorkizunerako aukera ezari loturiko testuinguruetan.

GKEok horretan dihardugu jatorrizko herrialdeetan, albistegietan egunero ikusten ditugun kalteak geldiarazteko asmoz. ALBOANen, 20 urte daramatzagu bizitza duinaren aldeko lanean, Kongoko Errepublikan, Burundin, Ruandan, Txaden, Indian, Hondurasen, El Salvadorren, Nikaraguan, Guatemalan, Perun, Kolonbian eta Venezuelan. 200 ekimen baino gehiago abiarazi ditugu, 470.000 pertsona baino gehiagoren bizi-baldintzak hobetzeko asmoz. Pertsona horiek eta haien familiek ez dezaten beren etxetik ihes egin.